hybu'r iaith yn lleol

Yn dilyn llwyddiant ysgubol cwrs Ma’ Dy Gymraeg di’n Grêt y llynedd yng Nghlydach fe ddechreuodd yr ail gwrs eleni yn Nhreforys. Y tro yma mae’r grŵp wedi bod yn ffodus iawn o dderbyn cefnogaeth a chymorth Prif Athrawes Ysgol newydd Tan y Lan yn Nhreforys, Catrin Jones fu’n annog rhieni i ddod i’r sesiynau.
Mae’r cwrs 10 wythnos yn rhoi hwb i rieni lleol ddod at eu gilydd i ymarfer eu Cymraeg ac ail gydio yn eu sgiliau ieithyddol, gyda wyth rhiant yn mynychu’n gyson.
Dechreuwyd y cwrs gyda sesiwn syml o gwis Cymraeg, gweithdy addurno cacennau bach, gweithdy creu bagiau rhoddion, gweithdy addurno cardiau Nadolig a phen-blwydd.
Ers dechrau’r cwrs mae hyder ieithyddol 2 o’r rhieni wedi codi cymaint nes mynd ymlaen i gynorthwyo yng Nghylch Boreol Ysgol Tan y Lan.

Yn fwy ddiweddar cafwyd sesiwn gymdeithasol yn un o dafarndai Treforys. Daeth sawl un o’r grŵp a’u plant. Bu’n gyfle hyfryd i’r plant ar oedolion i gymdeithasu drwy gyfrwng y Gymraeg.

Am fanylion pellach mae croeso i chi gysylltu â Menter Iaith Abertawe ar 01792 460 906

‘Ma’ dy Gymraeg di’n Grêt!’ yn gynllun peilot sydd wedi ei gynnal mewn sawl ardal yng Nghymru yn ystod y misoedd diwethaf. Mae’r cynllun yn annog pobl sy’n gallu siarad Cymraeg i ddefnyddio’r iaith yn gymdeithasol. Y gobaith yw gallu newid arferion rhieni sy’n gallu siarad Cymraeg ond sydd wedi arfer siarad Saesneg gyda’i gilydd.

Ar y cyd a TWF, trefnodd Menter Iaith Abertawe 10 sesiwn yn Ysgol Gynradd Gymraeg Gellionnen er mwyn ymarfer defnyddio’r Gymraeg wrth wneud gweithgareddau crefft - o wneud cardiau i drefnu blodau, peintio gwydr, canu gwerin, tylino llaw a gemwaith. Dywedodd Shelley Rees o Fenter Iaith Abertawe fu’n arwain y cynllun ar y cyd gyda TWF “Doedd un rhiant erioed wedi ystyried siarad Cymraeg gyda’i baban newydd hyd nes iddi ymuno a’r cynllun hwn am mai Saesneg oedd iaith y cartref er ei bod hi wedi derbyn addysg cyfrwng Cymraeg.”

Mae’r sesiynau bellach yn parhau yng nghaffi “Fresh 2 Lips” yng nghanol Clydach pob bore dydd iau a chroeso i unrhyw aelod newydd i ymuno a’r grŵp. Roedd yn gyfle i wneud ffrindiau newydd, a chodi hyder yr unigolion mwy parod i edrych ar ddigwyddiadau cyfrwng Cymraeg ac ymuno a gweithgareddau teuluoedd cyfrwng Cymraeg.

twfcymru.com